Deu 5 | ZomZIV | STEP | Moses in Israel-te khempeuh samin: “Israel-te aw, za un, thukipte le thukhamte tuni-in note zakin kong genkhia hi. Tuate sin unla limtakin zui un.

Deuteronomy 5

Thupiak Sawmte

1 Moses in Israel-te khempeuh samin:

“Israel-te aw, za un, thukipte le thukhamte tuni-in note zakin kong genkhia hi. Tuate sin unla limtakin zui un. 2 TOPA eite Pasian in Horeb ah eite tawh thukhun khat a bawl khin hi. 3 TOPA in hih thukhun i pate tawh a bawl hi loin eite tawh a bawl hi a, tuni mahmah a nungta lai eite khempeuh tawh i bawl hi. 4 TOPA in mualtunga meikuang lak pan maitang kituahin note tungah a gen ahi hi. 5 (Tua hun laitakin TOPA thugen hong genkhia dingin TOPA le note kikalah ka ding hi; bang hang hiam cih leh meikuang na kihta uh a mualtungah na kahto kei uh hi.) Tua ciangin amah in: ^a

6 “Keimah in na salsuahna uh Egypt leitang panin note hong paikhiatpih TOPA note Pasian ka hi hi. ^b
7 “Note in ka mai-ah ^{▼▼5.7 Ahikeh tua lo} pasian dang na nei kei ding uh hi.
8 “Note in tunga van ahi a, nuai-a lei ahi a, leinuai tui sungah ahi zongin a om na khatpeuh tawh kisunin lim na bawl kei ding uh hi. 9 Tuate bia in na kun kei ding uh hi; ahang in, keimah TOPA note Pasian a aam Pasian ka hi hi. Kei hong mudah a pate uh mawhna hangin khang thum khang lina dongin a tate tungah ka thuka, 10 ahi hangin kei hong it a, ka thupiakte a zuite tungah khang tul dongin ka itna ka lak hi. ^d
11 “TOPA note Pasian min na zangkhial kei ding uh hi, ahang in, TOPA in ama min a zangkhialte a mawhsak pelmawh ding hi.
12 “TOPA note Pasian hong thupiaksa bangin Sabbath ni siangthotakin tang un. 13 Niguk sung na semin na sep ding teng uh sem un, 14 a ni sagihna ni ahi leh TOPA note Pasian Sabbath ni ahi hi. Tua ni-in na nasemnu, na nasempate uh no mah banga a tawlngak theih nadingun no na hi uh a, na tanu na tapate uh ahi zongin, na nasemnu, na nasempate uh ahi a, na bawngtal, na laa le na ganhingte khatpeuh ahi a, no huang sunga om mikhual khatpeuh ahi zongin na na sem kei ding uh hi. 15 Note Egypt ah sila na hina uh le TOPA note Pasian in tua lai pana a thahat khut le a zankhiat ban tawh hong paikhiatpih ahilam phawk un. Tua ahi manin TOPA note Pasian in Sabbath ni na tan dingun thu hong pia hi. ^e
16 TOPA note Pasian hong piakna gamah sawtpi nungta-in na nopsak theih nadingun TOPA note Pasian hong thupiak bangin na nu le na pa pahtawi in. ^f
17 “Tual that kei in.
18 “Angkawm kei in. ^g
19 “Gu kei in. ^h
20 “Na vengpa langah a maan loin teci pang kei in. ⁱ
21 “Na vengpa zi deihgawh kei in. Na vengpa inn ahi a, a leitang ahi zongin; a nasemnu ahi a, a nasempa, a bawngtal, a laa le na vengpa tawh kisai na khatpeuh ahi zongin deihgawh kei in,” a ci hi. ^j

22 Hihte, TOPA in mualtung a mei le khuamial sahpi sung meikuang lak panin a kikhawm mipi bup tungah a tangko hi a; bangmah dang a genbeh kei hi. Tua ciangin suangpek nih tungah gelhin tuate kei hong pia hi.

23 Meikuang in mual kanga, khuamial lakah awging na zak uh ciangin na beh makaite uh le na upate uh ka kiangah hong pai uh hi. 24 Tuateh note in, “TOPA note Pasian in a minthanna le a thupina eite hong lak khin a, meikuang lak panin ama aw i za hi. Pasian in mite hopih ta leh mite a nuntak lai veve lam tuni-in i mu hi. 25 Bang hangin tu-in, eite si zenzen ding i hi hiam? Hih mei lianpi in eite hong hultum dinga TOPA eite Pasian aw za lai lehang i si ding hi. 26 Ahang in, a si thei mihing, eite zak bangin mei sungah a nungta Pasian aw za a, a hing lai kiza ngei ahi hiam? 27 A kiang nai unla TOPA eite Pasian thugen khempeuh ngai un. Tua ciangin TOPA eite Pasian in nang tunga hong gen peuhmah ko tungah hong gen in. Kote in ngai-in ka mang ding uh hi,” na ci uh hi. ^k

28 Kei kianga nong genna uh TOPA in na za a, TOPA in kei tungah, “Hih mite in nang tungah hong gen uh ka za hi. Hong gen khempeuh uh a hoih hi. 29 Amaute le a tate uh adingin a hoih den theih nadingin hong kihta dingin a lungsim uh kei tungah hong kinga uh henla ka thupiakte zui den le uh ka deih hi. ^l

30 “Pai inla a puanbuk uah ciahkiksak in. 31 Ahi hangin amaute neih dinga ka piak ding gamah a zuih dingun na hilh ding thupiakte, thukipte le thukhamte kong piak theih nadingin nang hih lai-ah om in,” hong ci hi.

32 Tua ahi ciangin TOPA note Pasian in hong thupiakte limtakin sem unla veilam ahi a taklam ahi zongin pial kei un. 33 Na lak ding uh gamah daupai-in na khanto nadingun TOPA note Pasian hong thupiakna lampi ah kalsuan un. ^m